جامعہ بلوچستان میں طلبہ کو درپیش تعلیمی و انتظامی مسائل پر بی ایس او، بی ایس او پجار، پی ایس ایف، بلوچ اسٹوڈنٹس ایکشن کمیٹی اور پشتونخوا اسٹوڈنٹس آرگنائزیشن پر مشتمل طلبہ تنظیموں کے اتحاد نے گہری تشویش کا اظہار کرتے ہوئے جامعہ انتظامیہ سے مسائل کے حل کے لیے فوری اور عملی اقدامات کا مطالبہ کیا ہے۔
طلبہ تنظیموں کے اتحاد کے مطابق تنظیمیں عرصہ دراز سے طلبہ کے بنیادی تعلیمی حقوق کے تحفظ، سازگار تعلیمی ماحول کی فراہمی اور دیگر مسائل کے حل کے لیے آواز اٹھاتی رہی ہیں، تاہم تاحال جامعہ انتظامیہ کی جانب سے مؤثر اور سنجیدہ اقدامات نہیں کیے گئے۔ طلبہ کے مسائل کو مسلسل نظرانداز کرنے سے ان کی تعلیمی سرگرمیاں اور مستقبل متاثر ہونے کا خدشہ ہے۔
طلبہ تنظیموں نے اپنے اہم مطالبات میں جامعہ میں کلاسز کا باقاعدگی سے انعقاد اور اساتذہ کی حاضری یقینی بنانے پر زور دیتے ہوئے کہا ہے کہ اس سلسلے میں مؤثر اقدامات کیے جائیں تاکہ طلبہ کا قیمتی وقت ضائع نہ ہو اور تعلیمی سرگرمیاں متاثر نہ ہوں۔
اتحاد نے مطالبہ کیا ہے کہ طلبہ کو علمی، ادبی، سیاسی اور فکری سرگرمیوں میں حصہ لینے کے مساوی مواقع فراہم کیے جائیں تاکہ ان کی تخلیقی، فکری اور تعلیمی صلاحیتوں کو فروغ مل سکے۔
طلبہ تنظیموں نے طلبہ کو ہراساں کرنے اور ان کے ساتھ نامناسب رویے سے متعلق شکایات کا فوری، شفاف اور غیر جانب دارانہ جائزہ لینے کا مطالبہ کرتے ہوئے کہا ہے کہ طلبہ کے لیے محفوظ، باعزت اور سازگار تعلیمی ماحول یقینی بنایا جائے۔
اتحاد نے اپنے سابقہ مطالبات پر بھی سنجیدگی سے عمل درآمد کرنے اور ان پر ہونے والی پیش رفت سے طلبہ کو واضح طور پر آگاہ کرنے پر زور دیا ہے۔
طلبہ تنظیموں نے جامعہ میں ہال کی سہولت کی فراہمی میں مساوات کا معاملہ بھی اٹھاتے ہوئے کہا ہے کہ مختلف اداروں اور محکموں کے پروگراموں کے لیے ہال فراہم کیے جاتے ہیں۔ گزشتہ روز موٹر وے پولیس کے پروگرام اور اگلے روز نارکوٹکس سے متعلق پروگرام کے لیے ہال کی سہولت فراہم کیے جانے کے تناظر میں سوال اٹھایا گیا ہے کہ اگر دیگر اداروں کو یہ سہولت دی جا سکتی ہے تو طلبہ اور ان کی تنظیموں کو اپنی علمی، ادبی اور مثبت سرگرمیوں کے انعقاد کے لیے یہی سہولت کیوں فراہم نہیں کی جاتی؟
اتحاد کا مطالبہ ہے کہ جامعہ انتظامیہ ہال کی فراہمی کے لیے واضح، شفاف اور یکساں اصول وضع کرے اور طلبہ کو بھی اپنی علمی، ادبی اور فکری سرگرمیوں کے انعقاد کے لیے مساوی مواقع فراہم کرے۔ جامعہ کے وسائل اور سہولیات تک رسائی میں طلبہ کے ساتھ امتیازی سلوک نہیں ہونا چاہیے۔
طلبہ تنظیموں کے اتحاد نے کہا ہے کہ جامعہ انتظامیہ طلبہ کے مسائل کو مزید نظرانداز کرنے کے بجائے ان کے حل کے لیے فوری اور عملی اقدامات کرے۔ ایک تعلیمی ادارے کی بنیادی ذمہ داری ہے کہ وہ طلبہ کو معیاری تعلیم، مساوی مواقع، اظہارِ رائے کی آزادی اور پُرامن و سازگار تعلیمی ماحول فراہم کرے۔
اتحاد نے واضح کیا کہ طلبہ کے جائز تعلیمی حقوق کا تحفظ اور ان کے مسائل کا حل اس کی بنیادی ترجیحات میں شامل ہیں۔ جامعہ انتظامیہ کو چاہیے کہ وہ طلبہ تنظیموں کے ساتھ سنجیدہ مذاکرات کرے اور تمام جائز مطالبات کو ترجیحی بنیادوں پر حل کرنے کے لیے عملی پیش رفت یقینی بنائے۔
