اسلام آباد میں بین الاقوامی اسلامی یونیورسٹی کی گولڈ میڈلسٹ طالبہ لائبہ سے امریکا میں داخلے کے نام پر فراڈ کرکے لی گئی رقم والد کو واپس مل گئی جبکہ والد نے کہا کہ میرے ساتھ جو حادثہ ہوا ہے اس سے بھول نہیں سکتا۔
وفاقی وزیر داخلہ محسن نقوی اور وزیر مملکت طلال چوہدری نے فراڈ کا شکار ہونے کے بعد خود کشی کرنے والی طالبہ لائبہ اعجاز کے گھر کا دورہ کیا اور والد سے ملاقات کی۔ چیف کمشنر اسلام آباد، آئی جی اسلام آباد اور دیگر متعلقہ افسران بھی اس موقع پر موجود تھے۔
لائبہ کے ورثا کو 50 لاکھ روپے کی رقم واپس کی گئی، محسن نقوی نے آئی جی پولیس کی موجودگی میں رقم لائبہ کے والد کے حوالے کی۔
محسن نقوی نے مرحومہ کے اہل خانہ سے تعزیت کی، فاتحہ خوانی اور دعائے مغفرت کی، لائبہ اعجاز کیس میں ہوئی پیش رفت سے اہل خانہ کو آگاہ کیا۔
محسن نقوی نے کہا کہ لائبہ اعجاز کیس میں پوری ٹیم نے دن رات محنت کی، آپ سے کیا گیا وعدہ پورا کرنا ہمارا فرض تھا۔
