پنجابی بھارتی سپر اسٹار دلجیت دوسانجھ اور اداکارہ ہانیہ عامر کی فلم ’سر دار جی 3‘ نے پاکستان میں باکس آفس پر نیا ریکارڈ قائم کر دیا۔
دلجیت دوسانجھ اور ہانیہ عامر کی فلم ’سر دار جی 3‘ پاکستان میں شاندار کامیابی سمیٹ رہی ہے اور باکس آفس پر تاریخ رقم کر چکی ہے۔ بھارت میں پابندی کا سامنا کرنے کے باوجود، فلم نے بین الاقوامی سطح پر خاص طور پر پاکستان میں بہترین کارکردگی دکھائی۔
پنجابی فلموں کو پاکستان میں اب بھی ریلیز کی اجازت حاصل ہے، کیونکہ زیادہ تر فلم ساز قانونی طور پر برطانیہ یا کینیڈا سے وابستہ ہوتے ہیں اور ان کی فلموں پر پاکستان میں پابندی عائد نہیں ہے۔ یہی وجہ ہے کہ سردار جی 3 نے پاکستان میں ریلیز کے پہلے ہفتے میں 21 کروڑ پاکستانی روپے (6.34 کروڑ بھارتی روپے) کا بزنس کیا۔
ریلیز کے دوران تعطیلات کے باوجود اس کامیڈی فلم نے دوسرے ہفتے میں مزید 9.50 کروڑ روپے (2.86 کروڑ بھارتی روپے) کمائے، جبکہ تیسرے ہفتے کے ایک دن کے اندر 10 کروڑ روپے یعنی (3.02 کروڑ بھارتی روپے) کا بزنس کر چکی ہے۔
اس فلم کی اب تک کی پاکستان سے کل کمائی 12.23 کروڑ بھارتی روپے تک پہنچ چکی ہے جو کہ پاکستانی روپے کے مطابق 40.51 کروڑ روپے بنتے ہیں اس طرح ’سر دار جی 3‘ پاکستان میں سب سے زیادہ کمائی کرنے والی بھارتی فلم بن گئی ہے، جس نے ’کیری آن جٹہ 3‘ کو بھی پیچھے چھوڑ دیا ہے۔
واضح رہے کہ تجزیہ کاروں کے مطابق سردار جی 3 کا بزنس آئندہ ہفتوں میں 60 کروڑ پاکستانی روپے تک پہنچنے کی توقع ہے۔
